Општина Кисела Вода денес започна со решавање на еден голем децениски проблем на жителите на селото Драчево. На улицата “Речиште”, до крајот на годината ќе биде изградена фекална канализација со 200 нови приклучоци, а бенефитот ќе го почувствуваат уште околу 600 други жители, кои имаат низа проблеми од хигиенски и санитарен аспект поради преоптоварување на постојната мрежа.
-Денес, после 30 години на “Речиште” започнуваме со изградба на фекална канализација, проблем со кој нашите сограѓани се мачеа во изминативе 30-тина години, а беше и еден од приоритетите во нашата програма. Овде, денес започнуваме со зафат кој вклучува 1100 метри фекална канализација. Практично, цел овој појас овде, од преку 200 домаќинства ќе биде покриен и на тој начин ќе го решиме овој нивен долгогодишен проблем. За овој проект, ние како Општина издвоивме 17.5 милиони денари. Средства, пари од нашите граѓани кои ги насочуваме директно кон нив-изјави градоначалникот на Општина Кисела Вода, Орце Ѓорѓиевски.
На настанот, покрај претставниците на Советот, пратеници од Општина Кисела Вода и голем број од локалното население, присуствуваше и Претседателот на партијата ВМРО ДПМНЕ, Христијан Мицкоски, од чии редови беше избран градоначалникот на Општина Кисела Вода, Орце Ѓорѓиевски.
Тој го поздрави почетокот на реализацијата на овој крупен проект и потенцираше дека местото на градоначалниците е меѓу граѓаните, дека нема простор за жалење од катастрофалната состојба, дека ракавите треба да се засукаат и дека треба да се работи.
Извор: Општина Кисела Вода
