Северна Македонија и Косово имаат добра соработка во областа на образованието, но и кај двете страни постои интерес таа уште повеќе да се продлабочи. Меѓусебната поддршка е многу важна во процесите за унапредување на националните образовни системи и за обезбедување на повеќе и подобри образовни можности за граѓаните.
Ова е заклучокот од вчерашната средба помеѓу министрите за образование и наука на двете земји, Јетон Шаќири и Арберије Нагавци која се одржа во Скопје, а на која тие се обврзаа за преземање на понатамошни чекори за потпишување на билатерална програма за образовна соработка, која би била од значење при воспоставувањето на формални релации помеѓу образовните институции и установи на сите нивоа.
„Добро е што и кај двете страни има силна волја за јакнење на соработката. Свесни сме дека со меѓусебно помагање можеме побрзо да ги развиваме нашите општества, а со тоа и регионот, кој би станувал сé повеќе конкурентен во пошироки размери и од повеќе аспекти“, рече министерот Шаќири.
Тој се осврна и на актуелните реформи кои се спроведуваат во образованието во Северна Македонија, а ги претстави и идните приоритети, меѓу кои, како што рече највисоки се модернизацијата на учебниците, подобрувањето на образовната инфраструктура и дигитализацијата.
Министерката Нагавци исто така говореше за тековните активности на косовската Влада во насока на подигнување на квалитетот на образованието, истакнувајќи дека искуството на Северна Македонија со реформирање особено на основното и на средното стручно образование е важно и би можело да се помогне при креирање на идните образовни политики на Косово.
Покрај министрите за образование и наука, на средбата присуствуваше и косовскиот амбасадор во Скопје, Приндон Садриу, како и раководители на повеќе сектори во двете министерства.
