Во Средното општинско стручно училиште „Илинден“- Илинден опремен е нов кабинет за потребите на учениците по предметот програмирање, уредување на веб страни, автоматика, мултимедија, како и за потребите на останатите стручни предмети.
Набавени се 44 мини десктоп компјутери i5, со исто толку монитори, како и 11 десктоп компјутери. Сите компјутери се со лиценциран Windows 11 Professional.
Градоначалникот на Општина Илинден, Александар Георгиевски го посети средното училиште и истакна дека локалната самоуправа континуирано работи на обезбедување квалитетни услови во образованието и успешно реализирање на образовниот процес, затоа што една од најзначајните области за развој на општина Илинден е инвестирањето во образованието.
-Мораме да им обезбедиме на учениците да ги покажат своите способности, преку опремување на кабинетите со современа компјутерска опрема, а за наставниците преку соодветно опремените кабинети им овозможување одлични услови за работа, изјави градоначалникот Георгиевски.
Користењето на новата информатичка опрема ќе овозможи поуспешно реализирање на образовниот процес преку примена на нова и напредна информатичка техника и технологија, а учениците ќе можат да ги продлабочат и прошират своите знаења, вештини и умеења во квалификациите Електротехничар за компјутерска техника и автоматика и Електротехничар за електроника и телекомуникации.
Извор: Општина Илинден
