О.Кисела Вода: Одржан вондреден состанок по најавите на УХМР за бурата „Андреа“

По најавите на УХМР за претстојното невреме, бурата „Андреа“, изминатиот викенд (12.05) градоначалникот Филип Темелковски во својот кабинет одржа вондреден состанок со кризниот штаб на Општина Кисела Вода.

На состанокот градоначалникот, Филип Темелковски, претседателот на Советот на Општина Кисела Вода, Дарио Шимиќ, помошник командирот на ПСОН Кисела Вода, Благоја Стојановски и претставници на кризниот штаб/вработени во Општината дискутираа за преземање на сите потребни мерки за заштита на населението од најавеното големо невреме кое се очекува да се интензивира во текот на оваа седмица.

Локалната самоуправа апелира до граѓаните при електрични празнења да не претстојуваат на отворен простор и под осамени дрвја, да не ги паркираат своите возила под дрвјата и во близина на одводните канали. Граѓаните проблемите/опасностите од временската непогода можат да ги пријават на бесплатниот телефонски број 195, во Центарот за управување со кризи.

Од УХМР најавија можни обилни врнежи од дожд со количина од над  50л/м2.

Извор: Општина Кисела Вода