Влада: Работна средба со Државниот секретар на МВР на Германија-Мајер

Претседателот на Владата на Република Северна Македонија Зоран Заев денеска го прими Државниот секретар на Министерството за внатрешни работи на Сојузна Република Германија Штефан Мајер, кој беше придружуван од германскиот амбасадор во нашата земја Томас Герберих.

Премиерот Заев на средбата ги пренесе впечатоците од последната средба со канцеларката Ангела Меркел во Берлин во рамките на Самитот за Западен Балкан и уште еднаш ја истакна благодарноста за поддршката што нашата земја ја добива од СР Германија и лично од канцеларката Меркел.

Блиските пријателски односи меѓу двете земји се отсликуваат во повеќе области, со посебна нагласка на економската соработка, како и во соработката на прашањата за евро-атлантските аспирации на Република Северна Македонија меѓу кои истакнато место има заедничката соработка на планот на безбедноста.

Државниот секретар на Министерството за внатрешни работи на Сојузна Република Германија Штефан Мајер на средбата со Претседателот на Владата на РСМ Заев ги пренесе поздравите од министерот за внатрешни работи на СР Германија Хорст Зихофер, и ја нагласи благодарноста на неговата земја за исклучително значајната соработка на двете земји на планот на безбедноста и на заедничките иницијативи во менаџирањето на бегалската криза.

На средбата во Владата на РСМ беше заеднички констатирано дека двете земји остануваат посветени на взаемната поддршка и соработка и дека СР Германија продолжува да ја афирмира потребата Република Северна Македонија да ги отпочне преговорите со ЕУ во најавениот термин, како поддршка на остварените реформи и на решавањето на сите отворени прашања со соседите.

Извор: Влада