Влада: Во Календарот за имунизација се воведуваат две нови вакцини – Вакцина против Рота вирусот и Пневмококна вакцина

Министерот за здравство, Венко Филипче, на ден 19.04.2019 година присуствуваше на одбележувањето на Европската недела на имунизација, која оваа година се одбележува од 24-ти до 30-ти април.

На настанот во Зоолошката градина во Скопје учествуваа деца од градинките од Општина Центар и учениците од основното музичко училиште од Струмица ООМУ „Боро Џони“, каде настапија со свои точки од концертот на маски „Џунгла“.

Идејата е на забавен, но истовремено и на едукативен начин да ја подигнеме свеста за вакцинацијата како е една од најуспешните здравствени мерки во светот. Со воведувањето на вакцинацијата како мерка од заразни болести, постигнати се најдобрите резултати во историјата на медицината.

Со вакцинацијата се подига колективниот имунитет, односно кога има висок степен на вакцинирани во општеството, минимален е ризикот болеста да се шири. Ова е важно, посебно за лицата кои поради различни здравствени причини не може да бидат вакцинирани. Колективниот имунитет овозможува тие што се заштитени преку вакцинација да ги заштитат ранливите групи кои имаат најголем процент на смртност при ширење на болеста.

„Со редовна вакцинација ги заштитуваме нашите деца, најблиски и пошироката заедница од тешки заразни заболувања. Високиот опфат на вакцинација на соодветна возраст, создава колективен имунитет. Министерството за здравство, годинава, во Календарот за Имунизација воведува две нови вакцини – вакцина против Рота вирусот и Пневмококна вакцина“, истакна министерот Филипче.

Со вакцината против рота вирусот се заштитени најголем процент од децата кои ја примиле (9 од 10 деца). Вакцинацијата се спроведува со орална ротавирусна вакцина во три дози со ставање капки во устата на детето, на возраст од шест недели до 32 недели. Првата доза од вакцината треба да се даде пред детето да наполни 15 недели, додека сите три дози на вакцината треба да бидат примени пред да наполни осум месеци. Повеќето бебиња, кои примиле ротавирусна вакцина немаат несакани ефекти од вакцината. Милиони бебиња од 94 земји во светот безбедно ја имаат примено оваа вакцина.

Со пневмококната вакцина се намалува можноста за пренос на вирусот. Третманот на пневмококни инфекции со антибиотици не е толку ефикасен, поради големата отпорност на бактеријата кон антибиотици, што ја прави вакцинацијата уште поважна превентивна мерка. Вакцинирањето е најдобриот начин детето да се заштити од пневмококна инфекција.

Пневмококната вакцина се дава интрамускулно. Се користи пневмококна вакцина, која штити од повеќе серотипови пневмокок, кои се поврзуваат со тешки инфекции кај децата. Дететот може да прими од една до четири дози, во зависност од возраста на детето во моментот кога е почнато со вакцинација.

Вакцините не само што ја штитат единката, туку ја штитат и заедницата со создавање на колективен имунитет. Тие се исклучително квалитетни и проверени вакцини од европски производител. Опфатот на вакцинација мора да биде во просек околу 95% за сите вакцини. Вакцинацијата е фундаментална за постигнување на целите за одржлив развој на здраво население.

Извор: Влада