Делегација на Министерството за социјална политика, демографија и млади од 23 до 24 септември учествуваше на меѓународна конференција „Креирање на иднината 30 години после Пекинг: ефективни институционални механизми за унапредување на родовата еднаквост и зајакнување на жените”, во Тирана, во соработка со UN Women.
На конференцијата се дискутираше за постигнувањата, предизвиците и следните чекори во насока на остварување на Пекиншката Декларација за родова еднаквост. На овој настан во согласност со стратешките приоритети на Владата за унапредување на концептот на родова еднаквост и недискриминација во сите области на општественото живеење, превенција и заштита од сите форми на насилство спрема жените и девојчињата и вклучување на родовата перспектива во креирањето на политиките и буџетите беа истакнати следните заложбите на Министерството за социјална политика, демографија и млади:
• Ќе продолжи процесот на заjaкнување на веќе постоечкиот национален законодавен и политички систем, вклучувајќи и донесување на нови закони и политики кои ги вклучуваат родовите перспективи и главно се усогласени со ЦОР 5;
• Ќе продолжи процесот на донесување на нови законски решенија усогласени со ЕУ директивите, стратешки документи, програми и мерки за унапредување на родовата еднаквост и зајакнување на жените особено во областите на заштита од дискриминација, насилство врз жените и родово базирано насилство, економското зајакнување и родово одговорното буџетирање, здравствената заштита и пристапот до сексуално и репродуктивно здравје, со посебно внимание кон маргинализираните и ранливи групи жени;
• Во наредниот период земјата ќе продолжи со градење на капацитетите на вработените во јавната администрација за родова еднаквост и вклучување на родовата перспектива како и ќе ја зајакне финансиската поддршка за унапредување на родовата еднаквост и ЦОР 5;
• Ќе продолжи зајакнувањето на систематското следење и евалуација на спроведувањето на законите, политиките, стратегиите, националните акциски планови и мерките насочени кон унапредување на состојбата на родовата еднаквост и зајакнувањето на жените;
• Ќе се подобри инклузивниот/партиципативен процес во подготовката на политиките, со консултација на целните групи/засегнатите страни (на пример, жени од руралните области, Ромки, жени со попреченост и други маргинализирани групи);
• Ќе се продолжи со подобрување на производството и дисеминацијата на родовата статистика преку градење на капацитетите на ДЗС и другите актери во статистичкиот систем;
• Ќе се зајакне соработката и ќе се воведат јасни протоколи со производителите на административни податоци во националниот статистички систем за да се овозможи рационализирано производство, анализа, употреба и дисеминација на родовата статистика
• Ќе се направат напори за зголемување на финансиската поддршка и партнерството со граѓанските организации кои работат на родова еднаквост и зајакнување на жени за да се овозможи спроведување на активности на ниво на локалните заедници;
• Ќе продолжи со напорите за намалување на родовиот јаз во економијата и подобрување на положбата на жените на пазарот на трудот;
• Ќе се засилат реформите во образовниот процес за спроведување на родово-сензитивни програми кои работат на искоренување на родовите стереотипи, спречување на насилство и сексуално образование во насока на унапредување на репродуктивното здравје и
• Ќе се работи континуирано на едукација и информативни кампањи за подигање на свеста за справување со родовите стереотипи и дискриминаторски практики.
Извор: Министерство за социјална политика, демографија и млади
