Министерот за економија и труд Бесар Дурмиши денеска на прес-конференција во Министерството а економија и труд ги презентираше резултатите од Есенската потрпошувачка кошница.
Ви го пренесуваме неговиот говор:
Есенската кошница како мерка која што ја донесовме на крајот на септември веќе заврши, заклучно со вчерашниот ден.
Мерката беше спроведена успешно и според анализите на Министерството за економија ги даде очекуваните резултати.
Оваа мерка ја донесовме со цел да ги заштитиме граѓаните во време кога има зголемување на цените на основните прехранбени производи, пред се за време на празниците, односно да се стабилизираат цените и да не дојде до нивно нагло зголемување.
Тоа и се случи, со мерката успеавме да не дозволиме нагло зголемување на цените на основните прехранбени производи, туку нивни стабилизирање и намалување во одредени сегменти.
Нашите анализи кои ги споделивме покажуваат дека цените на производите од есенската кошничка се намалиле во просек од 5% до 10%, при што кај некои производи намалувањето на цените е помало, или воопшто и го нема (како на пр. лебот, маслото за јадење и млекото), додека кај други производи истото е значително поголемо (на пр. месо, зеленчук и млечни производи (сирење и кашкавал).
Секако дека за оваа мерка како што и самите знаете имавме забелешки во најголем дел од трговците и од дел од дистрибутерите, но таа сепак ги даде резултатите кои ги очекувавме, бидејќи заштитата на животниот стандард е наш приоритет.
Нашите податоци кажуваат дека искажано во заштеда во пари за едно четворочлено семејство, на месечно ниво заштедата од ограничените маржи и намалените цени на дел од производите изнесува од 690 ден до 1.360 ден по семејство, во зависност од начинот на исхрана, како и од изборот на маркети каде што се набавува истата.
Тоа го потврдуваат и податоците на Синндикатите од нивната синдикална кошница каде што во октомври во делот на храна и пијалоци е намалена за 935 денари.
Тоа укажува дека мерките на владата кој што се во моментот на сила дале резултати и цената на храната за еден месец е намалена.
Вкупното намалување на октомвриската синдикална кошница е 57 денари, но тука вклучува и кирија.
Во наредниот период како што најавивме ќе има божиќна кошница, рамазанска, велигденска кошница. Овие кошници ќе имаат различен состав на производи, во зависност од тоа штио најмногу се троши во тој период и во дијалог и со производителите и со трговците, оваа мерка ќе ја креираме да биде во интерес на сите и да биде лесно применлива.
Каков модел ќе одбереме ќе зависи од предлозите кои ќе ги добиеме, а секако треба да земеме во предвид дека во маркетите за време на празниците има попусти и акции на одредени производи, па ќе видиме како тие ќе можат да се вклучат во наредните кошници.
Она што е важно да кажам дека оваа мерка, односно кошничка нема да трае повеќе од еден месец.
Односно предвидени се со пократок рок на траење од 15 до максимум 30 дена.
Очекувам дека од почетокот на следниот месец ноември ќе има дополнително намалување на цените бидејќи како што знаете пред еден месец започна примената на Законот за нефер трговски практики и очекуваме со новите залихи на производи во маркетите да има и нови пониски цени.
Од денеска мерката за замрзнати маржи не е на сила, очекувам дека нема да има зголемување на цените од страна на трговците. Доколку се случи тоа односно доколку дојде до дивеење на цените без никаква основа тогаш Министерството за економија и труд ќе ги превземе сите мерки кои што ги има на располагање и ќе превземеме поригорозни одлуки се со цел да се заштити стандардот на граѓаните.
