Ученикот од ООУ „Лазо Трповски“ Никола Радоњанин го освои првото место на Државното првенство за основни училишта во шах (во категорија за ученици од шесто до деветто одделение), кое се одржа на 28 ноември годинава во Ресен. Во оваа возрасна категорија годинава на првенството се натпреваруваа досега најголем број натпреварувачи, вкупно 60, а деветтоодделенецот го освои првото место без загубена партија.
Организатор на првенството е Федерацијата на училишен спорт на Македонија, а во рамки на првенството согласно пропозициите, основецот Никола беше предводен од својот наставник-ментор Стефан Симовски.
Инаку Никола Радоњанин годинава успешно учествуваше на неколку силни шаховски турнири, и тоа: во септември на Меѓународниот шаховски турнир „Езерска кралица“ во Охрид освои прво место во возрасната категорија 14 години; на Скопје Опен 2024 го освои второто место во возрасната категорија 14 години. Во март годинава на турнирот Карпош Опен, младиот Радоњанин е прогласен за најдобар шахист, жител на општина Карпош.
Извор: Општина Карпош
