Проектот ,,Ѕвездите на Карпош”, наменет за деца со атипичен развој, ќе започне да се реализира од сабота, 15.02.20205 година, во спортската сала на ООУ ,,Јан Амос Кoменски” за жителите на општина Карпош. Локалната самоуправа финансиски ја поддржува оваа иницијатива која е идеја на долгогодишниот тренер и претседател на Карате клубот Скопје, Горан Алексовски заедно со тим од стручни соработници, а воедно и дел од Програмата за спорт на општина Карпош. Тие имаат за цел да ја реанимираат потребата на оваа ранлива категорија на деца во делот на стимулација на физичкиот и социо-емоционалниот развој преку друштвени спортски игри.
Целта на проектот е децата да учествуваат во спортски, друштвени и забавни активности. Со редовни тренинзи, да добијат подобрување на физичката кондиција, правилно дишење, агилност, упорност, издржливост, поврзаност во друштво, развивање на тимски дух, себе прифаќање, формирање на здрави навики, развој на моторните, а индиректно и на социјалните,емоционалните и интелектуалните вештини.
Овој тип на активности се од големо значење за оваа категорија на деца и млади, особено за создавање на здрави навики, подобар и поквалитетен живот, надминување на стереотипите со кои се соочуваат, како и нивна промоција во секојдневието и јавноста.
Проектот ќе започне на средината на февруари и ќе трае осум месеци, во две етапи, а ќе ја опфати возрасната категорија од четири до 16 години за деца со атипичен развој. Тренинзите ќе се одвиваат секоја сабота од 9 до 10 часот во спортската сала на ООУ ,,Јан Амос Коменски”, кои се наменети само за
жителите на Карпош и кои ќе бидат бесплатни. За подетални информации и пријавување, заинтересираните родители на деца со атипичен развој, ќе може да се јават на телефонскиот број 071/243-239.
Извор: Општина Карпош
