Претседателот на Владата на Република Северна Македонија, Димитар Ковачевски и амбасадорката на САД во земјава, Анџела П. Агелер, денеска, потпишаа Меморандум за разбирање меѓу Владите на Северна Македонија и на Соединетите Американски Држави за експертска поддршка за Владата на Република Северна Македонија во изработка на Национална стратегија за безбедност.
„Оваа соработка во едно од најсуштинските прашања за државата е само уште една потврда за стратешкото партнерство и степенот на соработка меѓу нашите две земји. Како што знаете, на 19 септември, Владата ја усвои информацијата за потребата од изработка на Национална стратегија за безбедност, која ќе претставува еден суштински и стратешки документ, и обединувачка визија за нашата држава во дефинирањето на виталните и стратешките интереси за безбедно и стабилно општество“ истакна премиерот Ковачевски, во своето обраќање на денешниот настан по потпишувањето на Меморандумот.
При тоа, премиерот Ковачевски изрази благодарност до Амбасадата на САД и посебно до амбасадорката Агелер за оваа поддршка.
Стратегијата е предвидено да ги интегрира сите министерства и институции кои имаат пристап до заштитата и промовирањето на безбедносните интереси на земјата и ќе го определи местото на Република Северна Македонија во регионалниот, европскиот и глобалниот безбедносен контекст.
„Ме радува што за оваа цел и преку Меморандумот кој што ќе го потпишеме денеска, кон тимот наши експерти се приклучува и американски професионалец за национална безбедност со над 35 години работно искуство во стратешко планирање, извршни комуникации и мултинационални операции, како и истакната воена служба на глобално ниво“, потенцираше премиерот Ковачевски.
Амбасадорката на САД во земјава, Анџела П. Агелер истакна дека е чест да се биде дел од денешниот настан на потпишување на Меморандумот за разбирање меѓу САД и Република Северна Македонија за експертска поддршка за Владата на Република Северна Македонија во изработка на Национална стратегија за безбедност, кој е составен дел од Стратешкиот дијалог меѓу двете земји.
„Ова е многу важно потпишување за нас како САД со нашиот битен стратешки партнер, Северна Македонија. Како што реков утрово, дозволете ми да повторам уште еднаш. САД е горда, ние сме горди на нашето пријателство и на поддршката и соработката со оваа земја и горди сме што ова е стратешко партнерство кое што носи огромни придонеси за двете земји. Тоа не е еднострано партнерство, и тоа го имаме видено не само во членството на оваа земја во НАТО и придонесите кои што сте ги давале досега кон Украина, туку и во многу други аспекти од нашето партнерство и пријатество“, потенцираше амбасадорката на САД во земјава, Анџела П. Агелер, во нејзиното обраќање при потпишувањето на Меморандумот за Меморандумот за разбирање меѓу САД и Република Северна Македонија, со којшто се овозможува советодавна поддршка во изработката на Националната стратегија за безбедност за Република Северна Македонија.
Извор: Влада
