Целта на студиската посета е запознавање со успешните модели за функционирање на младите фармери и мерките кои ги имаат како поддршка младите фармери во Словенија, со цел нивно пренесување во нашата држава како мерки за поддршка на младите земјоделци и фармери.
Во рамки на студиската посета нашата делегација оствари посета со претставници на Дирекцијата за земјоделство на Словенија на која беше презентирана поддршка за основање на фарми за млади фармери и акциониот план за работа со млади земјоделци на Словенија. Работни средби беа остварени и со претставници на Агенцијата на Република Словенија за земјоделски пазари и рурален развој, како и со Земјоделско-шумарската комора на Словенија.
Покрај поддршката од нас како министерство и Increasing Market Employability – IME партнери на оваа студиска посета се и Сојузот на млади фармери во Словенија, министерството за земјоделство, шумарство и храна на Словенија, како и амбасадата на нашата држава во Словенија.
Во делегацијата учествуваат по тројца млади фармери од трите најголеми социоекономски партнери на министерството, Национална федерација на фармери – National Federation of farmers – NFF, Мрежа на земјоделски задруги и Македонската Асоцијација на земјоделски задруги. Студиската посета се реализира во период од 22 до 26 јануари 2024 година.
