Капиталните расходи не се засегнати со ребалансот на Буџетот за 2024 година. Бројките покажуваат дека износот е ист, само е направена пренамена и средствата се насочени кон проекти коишто се очекува да имаат забрзана динамика. Ова го истакна министерката за финансии Гордана Димитриеска-Кочоска во гостувањето во „Тема на денот“ во рамките на Дневникот на Сител.
„Кога ќе ги погледнете бројките може да видите дека износот е ист. Сега нема средства за корупција и криминал, туку за реализација на проекти. Тоа се пари што ќе се наменат за проекти кои имаат додадена вредност. Капиталните расходи не се засегнати, поточно направена е пренамена на средства од капиталните инфраструктурни проекти со послаба реализација кон проекти на општините, затоа што знаеме дека има готови проекти кај сите општини коишто ќе може да се реализираат. Едноставно, не можеме да чуваме средства за нешто што нема да се реализира“, рече министерката за финансии.
Таа додаде дека аванси без никаква реализација нема да бидат исплаќани, туку дека ќе се плаќа врз основа на реализација.
„Илузорно е сега да планирате 250 милиони евра за проектот за коридорите 8 и 10д во ситуација кога не можете да завршите експропријација, имате еден куп проблеми, кога не ја знаете трасата, односно кога знаете дека нема да ги реализирате и тие средства на крајот на годината ќе завршеа во некои коруптивни зделки“, истакна Димитриеска-Кочоска и додаде дека за следната годината за овој проект ќе бидат планирани 250 милиони евра и дека веќе се работи на тоа проектот да почне да се реализира, да се гради и да се плаќа врз основа на завршени работи и ситуации.
Во интервјуто министерката се осврна и на барањето на синдикатите за зголемување на минималната плата, потоа на растот на платите, нивото на јавниот долг, како и на реализацијата на проектите од железничката инфраструктура.
Извор: Министерство за финансии
