Министерството за животна средина и просторно планирање одржа јавна расправа по предлозите за измени и дополнувања на Законот за води, што имaат за цел да обезбедат заштита, зачувување и подобрување на управувањето со водните ресурси преку рационално и одржливо користење на водите, појасни и дефинирани постапки за користење на водите, испуштање во водите и заштита на режимот на водите.
Јавната расправа ја отвори министерот за животна средина и просторно планирање, Насер Нуредини кој истакна дека на овие измени и дополнувања се работи од јуни месец минатата година, период во кој беа спроведени конструктивни и сеопсежни консултации со многу засегнати страни и со исклучителна отвореност и соработка и со граѓанскиот сектор.
Јавната расправа, покрај учество со физичко присуство, овозможи и вклучување преку Зоом платформата.
Бројни претставници од граѓански здруженија и асоцијации, концесионерни на мали хидроелектрани, претставници на водостопански претпријатија, како и државни институции и други засегнати страни, во текот на конструктивнатата дискусија, ги разменија своите ставови и забелешки во правец на подобро финализирање на еден ваков комплексен закон.
Предлог измените и забелешките на Законот за води се достапни на веб страницата на ЕНЕР и на МЖСПП, а крајниот рок за доставување на забелешки и коментари по истите е 15 март 2022 година.
Јавната расправа беше организирана со поддршка на кампањата за застапување и лобирање „Разбистри сè“, која ја спроведува Институтот за комуникациски студии, за да се овозможи поголема вклученост на јавноста и поголем степен на транспарентност.
Извор: Министерство за животна средина и просторно планирање
