Министерот за социјална политика, демографија и млади, Фатмир Лимани беше во посета на Општина Тетово, каде што заедно со градоначалникот на општина Тетово, Билал Касами, одржа координативен состанок со претставници на УСАИД и Ромалитико. Целта на состанокот беше иницирање проекти за унапредување на правата на Ромите и успешна имплементација на Стратегијата за инклузија на Ромите.
Општина Тетово е единствената локална самоуправа која создаде проектна единица за вклучување на Ромите и заради тоа ромската заедница во оваа општина е поинтегрирана во споредба со другите општини.
Во оваа прилика министерот Лимани апелираше до општините да ја следат истата практика и да придонесат за унапредување на правата на Ромите, подобрување на инфраструктурата, домувањето, а пред се нивното образование.
„Како министер за социјална политика, демографија и млади, сметам дека е потребно вклучување на младите Роми во младинскиот сектор во рамките на Министерството, со цел нивно вклучување во креирањето на политиките и остварувањето на интересите на младите Роми во општеството,“ порача Лимани.
Во текот на дискусијата посебен акцент беше ставен и на правото на вклучување на децата Роми во детските градинки, како и нивното право да бидат згрижени од негователки и воспитувачки Ромки, за кои ќе се побара согласности за нивно вработување.
Министерот Лимани истакна дека ова е само потврда за заложбите на министерството за еднаков пристап до можностите за вработување на Ромите и нивна целосна интеграција во нашето општество.
„Со поддршка од нашите партнери градиме подобра иднина каде секој граѓанин ќе се чувствува вклучен и поддржан,“ порача Лимани.
Извор: Министерство за социјална политика, демографија и млади
