На покана на Институтот за демократија „Социетас цивилис“ – Скопје, министерот за информатичко општество и администрација Јетон Шаќири беше дел од дискусијата за Законот за висока раководна служба.
Меѓу панелистите беа и Љупчо Николовски, Заменик претседател на Владата задолжен за борба против корупцијата и криминал, одржлив развој и човечки ресурси, Миша Поповиќ, Раководител на центар-постар истражувач на Институтот за демократија „Социетас цивилис“ и Билјана Ивановска, Претседател на Државната комисија за спречување на корупцијата.
„Во законодавството во Република Северна Македонија не постои јасно разграничување меѓу политичкото и професионалното ниво, односно не е јасно дефиниран и утврден опфатот за висока раководна служба. Со Законот за административни службеници е направен првиот исчекор кон професионализација на извршните раководители во административната служба’, потенцираше министерот Шаќири.
Министерот исто така посочи дека, Концептот на Висока раководна служба е започнат уште во 2018 година. Системот на висока раководна служба, кој како новина се предлага со овој закон, треба да обезбеди постигнување на две клучни цели, и тоа:
1) Професионални високи раководители, избрани преку отворена и меритократска постапка.
2) Воспоставување на односи на доверба и одговорност помеѓу политички избраните и именуваните лица и високите раководители.
Согласно годишната програма за работа на Влада, пакетот закони треба да влезе во Владина процедура во јуни, па во текот на летото ќе бидат доставени и во Собраниска процедура.
Извор: Министерство за информатичко општество и администрација
