На 04.06.2021 година, во Општина Ресен, Претседателот на Синдикатот на УПОЗ Пецо Грујовски и Претседателот на Синдикалната Организација при Општина Ресен Миле Чадевски и Градоначалникот на Општина Ресен Живко Гошаревски како работодавач, го потпишаа Колективниот Договор за вработените во Општина Ресен.
По неколку месечни преговори помеѓу работодавачот и синдикатот, денешното потпишување на договорот е значаен ден за вработените во општината од причина што со догововорот се регулираат правата и обврските на двете страни.
Со овој Колективен Договор, се утврдуваат и критериумите за годишен одмор, платени и неплатени одсуства, платите, надоместоците на плати и други примања, додаток на плата. Исто така, овој Колективен Договор го регулира и правото за службени патувања, регресот за годишен одмор, правата за јубилејни награди, како и прашањата на платите на помошно-техничкиот персонал, информирањето на вработените, а се пропишани и условите за слободно делување и условите за работење на синдикалната организација на општината.
Градоначалникот, Живко Гошаревски го истакна задоволството што преговорите со Синдикатот завршија успешно и што со Колективниот Договор се унапредени повеќе права на вработените.
Претседателот на УПОЗ Пецо Грујовски го истакна задоволството од соработката и потпишувањето на договорот и што и Општина Ресен со ова влегува во групата на општина кои го имаат потпишано Колективниот Договор со кои се искажува волјата за унапредување и грижа за вработените и нивното право од работниот однос.
Претседателот на синдикалната организација при Општина Ресен, Миле Чадевски, во име на членовите на синдикатот го искажа задоволството од потпишувањето на договорот и напомена дека со зголемувањето на правото од работниот однос се зголемува и мотивот за професионално извршување на обврските.
Извор: УПОЗ
