Во рамките на манифестацијата „Денови на хуманост- дарувај со љубов“ организирана по повод 3 Декември, Меѓународниот ден на лицата со попреченост, во посета на ЈЛБ„Илинден“ беа лицата од делчевскиот Дневен центар за лица со посебни потреби.
Посетата на градската библиотека беше со цел овие лица да се запознаат со библиотеката, начинот на работа и со богатството од книги. Директорката на библиотеката Билјана Петровска истакна дека секој на свој начин треба да даде придонес овие лица со посебни потреби полесно да се пробиваат низ животот и низ општеството.
– Лицата со посебни потреби кои го посетуваат Дневниот центар имаа своја работилница, изработуваат разни украси и сувенири и по повод Светскиот ден на лицата со посебни потреби, библиотеката им подари материјали што им се потребни за нивната работа. Да бидеме хумани, да помогнеме, да подариме за да можат и тие лица да создаваат, творат, да се чувствуваат корисни и успешни во средината во која живеат, истакна Петровска.
Манифестацијата „Денови на хуманост-дарувај со срце“ која се реализира 4-та година по ред е во организација на Општина Делчево со поддршка на ЈЛБ„Илинден“, НУЦК „Н.Ј.Вапцаров“ и Дневниот центар за лица со посебни потреби во Делчево и образовните институции во градот.
Целта на настаните обединети со едно име „Денови на хуманост“ е да се разбуди филантропијата и општествената одговорност и да се подигне свеста за лицата со хендипек и нивното место во општеството. Активностите имаат заеднички именител-дека нема свет со различности и дека секој еден е важен.
Извор: Општина Делчево
