Градоначалникот Костадин Костадинов, во Градската уметничка галерија ја отвори изложбата „LA PRIMA VOLTA“ или „ЗА ПРВ ПАТ“ на познатиот италијански фотограф Матео де Мајда.
На изложбата присуствуваше и амбасадорот на Република Италија во Република Северна Македонија, Андреа Силвестри, што е уште една потврда за одличната соработка меѓу Општината и Амбасадата.
Самиот наслов на изложбата укажува на еден историски успех на македонскиот спорт, особено на фудбалот, а тоа е првото учество на нашата фудбалска репрезентација на едно официјално Европско првенство, кое се случи минатата година. Иако оваа изложба ќе биде поставена и во други градови во нашава земја, сепак сметам дека поради Горан Пандев кој речиси целата своја интернационална кариера ја помина во Италија, но и поради тоа што беше најзаслужен за историскиот пласман на македонската репрезентација на последното Европско првенство во фудбал, изложбата најмногу и прилега на нашата Струмица, рече градоначалникот Костадинов.
Амбасадорот Силвестри на градоначалникот Костадинов му подари фотографија од спортскиот комплекс на Горан Пандев во Струмица.
Извор: Општина Струмица
