Во ООУ „Ѓорче Петров“ вчера беше отворена втората сензорна соба на територија на општината наменета за лица со и без образовни потешкотии, опремена со реквизити и стимулаторни алатки, придружени од стручна служба, специјален едукатор и рехабилитатор.
На Светскиот ден на здравјето се посветивме на учениците со попреченост. На отворањето присуствуваше градоначалникот Александар Стојкоски кој истакна дека интензивно работиме во насока на подобрување на условите за соодветно и еднакво образование, но и на зајакнување на инклузивните капацитети.
-На ваков начин се грижиме за ранливата категорија на ученици. Во ова училиште околу 20-тина дечиња ќе имаат придобивка од овој значаен проект. Општина Ѓорче Петров останува фокусирана на инклузијата и на еднаквоста во сите сфери. Во оваа насока, размислуваме и за отворање дневен центар наменет за социјално-ранливи категории – рече Стојкоски.
Благодарност до општествено одговорните – фондацијата „Чекор по чекор“, здруженијата „Инклузива“ и „Хендимак“, компанијата „Зегин“ и фондацијата „Верица Механџиска“ кои помогнаа во реализација на сензорната соба.
Извор: Општина Ѓорче Петров
