Во текот на последните месеци, Канцеларијата за Европа на Меѓународната телекомуникациска унија (ITU) соработуваше со Министерството за информатичко општество и администрација за изработка на Национална проценка за заштита на децата на Интернет за Северна Македонија. Ова вклучува интервјуа со засегнатите страни заедно со онлајн анкета која ги разгледува ставовите и искуствата на децата и родителите. Врз основа на овие докази и заклучоци, Извештајот дава препораки за напредок во заштитата на децата од Северна Македонија на Интернет.
Како клучен чинител за да се осигура безбедноста на децата на интернет, се одржа „Настанот за подигање на свеста и засегнатите страни за заштита на децата на Интернет“ организиран и поддржан од Министерството за информатичко општество и администрација, како и Министерството за образование и ITU Канцеларија за Европа.
Овој настан се базира на Националниот извештај за проценка на заштитата на децата на Интернет на ITU, кој може да го најдете на овој линк.
Настанот се одбележа со потпишување на Меморандум за соработка помеѓу Министерството за информатичко општество и администрации и Министерството за образование и наука за зајакнување на заштитата на децата на интернет на национално ниво.
“Не можеме да ги спречиме децата да користат интернет, но мораме да ги водиме кон побезбеден начин на користење на интернет за да ги спречиме од опасноста што може да произлезе од него. Министерството за информатичко опшстество и администрација разгледува начини како да ја подржи оваа иницијатива уште повеќе за подобра состојба на екосистемот за дигитална заштита на нашите деца . Наша цел е да и обезбедиме на нашата влада во сите нејзини институции, да се има можност претставниците на многу сектори да разговараат и да создадат координиран владин одговор по ова прашање. Спроведувањето на примарни, секундарни и насочени мерки за превенција и едукација на јавното здравје е императив за да се избегне влошувањето на ситуацијата“ – меѓу другото, рече министерот Алити.
Министерот за образование и наука , г-дин Шаќири укажа дека: “Децата немаат заштитен ѕид, firewall, за онлаjн ризици и закани. Него мора да изградиме ние како заедница, како системски одговор. Вакви сложени предизвици бараат ангажман од целото општество, вклучувајќи како на владиниот така и на граѓанскиот сектор, на бизнис заедницата, медиумите и на сите граѓани. Нема временски рамки, потребно е постојано внимание и подигнување на свесноста за онлајн заканите, насилството преку интернет, сајбер насилството и дигиталното вознемирување. Дигиталната писменост ја вградуваме во наставните планови со цел учениците да умеат да ги користат информатичко комуникациските технологии за да дојдат до информации, да можат умешно и ефективно да ги користат дигиталните алатки за решавање проблеми, споделување идеи, комуникација и соработка во училиштето и надвор од него. И што е најважно, сето тоа да го прават заштитувајќи се себе си, преку етичко и безбедно користење на дигитална технологија„
Г-дин Јарослав, Шефот на Меѓународната Унија за Телекомуникација (ITU) рече дека Унијата дава препораки при реализирање на вакви Проценки за Онлајн Безбедноста на Децата и затоа тука се Насоките на ITU за заштита на децата преку Интернет кои и се сеопфатен сет на препораки за сите релевантни чинители за тоа како да придонесат за развој на безбедна и охрабрувачка онлајн средина за децата и младите.
Меморандумот потпишан од министерот Алити и министерот Шаќири, вклучува и промоција на опасностите од штетните содржини кои се пласираат на интернет и други опасности од оваа област, а заради големата и растечка криза во областа на заштита на децата/младите на интернет, нивното ментално здравје, нивниот личен развој, работа на поткревање на свеста во однос на опасностите, како и барање начин да се обезбедат повеќе канали за пријавување на напади; Да се подобрат способностите на воспитувачите; Да се подобри достапноста и едноставноста на алатките за родителска контрола кои подобро ги штитат децата и ја зголемуваат свеста кај родителите.
Извор: Министерство за информатичко општество и администрација
