За време на официјалната посета на Соединетите Американски Држави, првиот потпретседател на Владата и министер за животна средина и просторно планирање Изет Меџити оствари работна средба со помошник-секретарот на САД за енергетски ресурси, Џефри Рос Пајат.
Меџити информира дека на оваа средба, на која бил продружуван од министерката за енергетика, рудници и минерални суровини, Сања Божиновска, се разговарало за состојбата со енергетските ресурси во земјава и долгорочните планови за инвестиции во овој витален економски сектор.
“На средбата разговаравме за енергетските ресурси во нашата земја, а посебно се фокусиравме на инвестициите што ги планираме за производство на електрична енергија од зелени извори. Една од нашите главни цели е да ја намалиме зависноста од увоз на енергија од други земји“, рече Меџити.
Првиот вицепремиер изјави дека важна точка од разговорот со помошник-секретарот за енергетика на САД било вклучувањето на Северна Македонија во Трансанадолскиот (ТАНАП) и Транс-јадранскиот гасоводот (ТАП), како план за значително намалување на увозната зависност на енергија од странство, што според него ќе придонесе за енергетска стабилност на земјата.
“Информирав и за долгорочниот план што нашата влада го составува во областа на енергетиката, за подобрување на квалитетот на воздухот и водите во државата. Посветеноста на зелената иднина останува наш приоритет” изјави вицепремиерот Меџити, по средбата со помошник секретарот Пајат, средба која ја остварил во склоп на официјалната посета на САД.
Извор: Министерство за животна средина и просторно планирање
