Министерот за европски прашања Орхан Муртезани заедно со заменик-министерката за европски прашања, Викторија Трајков одржаа средба со амбасадорката на Романија во Северна Македонија, Адела Моника Аксинте. Во фокусот на разговорите беа билатералните односи, постојаната поддршка на Романија за европската интеграција на Северна Македонија, Реформската агенда во контекст на Планот за раст на Европската Комисија за Западен Балкан и други актуелни случувања.
Министерот Муртезани се заблагодари на амбасадорката Аксинте за конзистентната романска поддршка за нашиот евроинтегративен процес и за гласната поддршка на политиката на проширување со ЕУ, како со земјите од Западниот Балкан, така и со земјите од Источното партнерство.
На средбата, соговорниците изразија подготвеност за продлабочување на соработката со Романија во спроведувањето на реформите преку споделување на искуства во процесот на преговори.
