Соработникот за енергетика во Канцеларијата на претседателот на Владата на Република Северна Македонија, Виктор Андонов на денешната прес-конференција ги соопшти последните информации кои се однесуваат на енергетската состојба во земјата.
Како што истакна, во рамки на заложбите на Владата за подигнување на јавната свест за тоа колку е важно штедењето на електричната енергија, институциите и компаниите се многу важни во овој процес и секој треба да направи мала промена во домот и на работното место, што ќе значи многу за енергетскиот систем.
На прес-конференцијата, соработникот Андонов ги презентираше податоците за направениот пресек од 15 дена, од 15.10.2022 заклучно со 31.10.2022 година и информираше дека за овој период, произведени се вкупно 199.830 мегават часови.
Во истиот овој период продадени се 600 мегават часови вишоци. Со ова, како што подвлече, со домашно производство на електрична енергија во периодот од 15.10.2022 до 31.10.2022 година, 100% се покриени потребите на домаќинствата и малите потрошувачи.
Соработникот Андонов го презентираше и дневниот енергетски биланс за 05.11.2022 година и истакна дека на вчерашниот ден се произведени се вкупно 11.360 мегават часови, од кои во термо електраните се произведени 8.242 мегават часови, додека од обновливи извори произведени од ЕСМ во кои се сметаат хидроелектраните и ветерниот парк во Богданци, произведени се 3.118 мегават часови електрична енергија, со што целосно се задоволени се потребите на малите потрошувачи и домаќинствата.
Соработникот за енергетика информираше дека дополнително, заклучно со крајот на октомври 2022 година, ЕСМ не само што го реализираше својот предвиден план за производство на електрична енергија, туку произведен е и некој гигават час на електрична енергија повеќе од предвиденото.
На денешната прес-конференција соработникот за енергетика упати апел до граѓаните да бидат спокојни, бидејќи финансиските средства се обезбедени, ликвидноста на АД ЕСМ е осигурана и струја ќе има за сите во текот на оваа зима.
Тој ја посочи енергетската транспарентност како врвен приоритет во справување со кризата и е исклучително важен принцип во правец на сочувување на стабилноста на енергетскиот систем.
„Состојбата во цела Европа е комплексна и секоја земја ги бара најоптималните решенија. Нашите позиции се јасни, работиме на зголемување на домашното производство и ги ставаме во погон сите енергетски капацитети во државата. Владата постојано ја следи состојбата на дневно ниво и ќе носи соодветни мерки за ублажување на последиците. Врвен приоритет е да се обезбедат најповолните услови и граѓаните да бидат заштитени“, подвлече Андонов.
Во оваа прилика соработникот за енергетика упати до сите граѓани да вложат максимални напори за штедење на електричната енергија со оглед на тоа што доаѓаат постудени денови. Тој информираше дека во октомври покрај добрите временски услови и намалениот конзум, голема улога одигра и штедењето на електрична енергија од граѓаните и институциите и дека во периодот што ни следува, имаме само еден избор, а тој е да штедиме и рационално да се однесуваме.
„Сега е време кога мора рационално да ги користиме енергенсите и да бидеме солидарни“, порача Андонов.
На прашањето дали и како ќе се санкционираат фирмите кои се префрлија на регулираниот пазар, Андонов истакна дека трендот на ваквите злоупотреби во текот на изминатата година за прв пат беше нотиран токму од државните институции, односно од страна на Регулаторната комисија за енергетика, и со овој тренд ќе се справуваат институциите преку соодветни мерки со кои би се спречила евентуалната злоупотреба на електричната енергија, за што јавноста најтранспарентно ќе биде информирана.
Извор: Влада
