МФ: 100 милиони евра евтини кредити за мали и средни фирми

МинистерстваМФ: 100 милиони евра евтини кредити за мали и средни фирми
spot_img

Најчитано

spot_img
spot_img

Договор за нови 100 милиони евра евтини кредити од Европската инвестициска банка (ЕИБ) со кои ќе се поддржат најмалку 300 проекти на домашни мали и средни компании, беше потпишан од страна на министерот за финансии, Фатмир Бесими, потпретседателката на ЕИБ, Лилјана Павлова и директорот на Развојната банка на Северна Македонија, Кире Наумов, во присуство на евроамбасадорот Дејвид Гир. Развојната банка ќе ги пласира средствата до фирмите преку комерцијалните банки.

Условите под кои ќе се даваат кредитите на фирмите се исклучително поволни, со рок на отплата до 12 години и вклучен грејс-период од 2 години, зависно од тоа дали кредитите ќе бидат наменети за инвестиции или заради зголемените потреби од обртни средства, и по исклучително поволна повластена каматна стапка, којашто за првите транши би изнесувала до 1,6%.

– Нашата определба како Влада е да продолжиме со фискалниот стимул на стопанството сѐ додека тоа не застане на здрави нозе. Претходните кредитни линии од Европската инвестициска банка, пласирани преку Развојната банка, покажаа навистина добри резултати. Денеска потпишавме исклучително важни договори со Европската инвестициска банка, со кои се обезбедуваат 100 милиони евра поволни средства за малите и средни комапнии во Република Северна Македонија, или една значајна ликвидносна поддршка за заздравување од ефектите од пандемијата на ковид-19. За нашата економија, овие средства значат нови вработувања, нови инвестиции, а со тоа и придвижување на економската активност и забрзување на економскиот раст – рече Бесими.

Оваа кредитна линија е дел од поддршката на Европската Унија и Европската инвестициска банка за адресирање на ефектите од пандемијата на ковид-19 врз економијата.

– Овие средства ќе одговорат на ликвидносните потреби на фирмите за обртни средства, но и ќе поттикнат долгорочни инвестиции во Република Северна Македонија, во контекст на економско заздравување и иден раст. Кредитната линија е дел од иницијативата Тим Европа и финансискиот пакет на ЕИБ за поддршка на земјите од Западен Балкан при опоравувањето од ковид-19. Ja користам оваа можност да ја изразам целосната поддршка на ЕИБ кон Република Северна Македонија и регионот во постигнувањето на нивните цели и реформи, во согласност со политиките на ЕУ. Со нетрпение очекуваме напредок на пристапниот пат на Северна Македонија, како и да ја продолжиме нашата блиска соработка со Владата, Развојната банка, ЕУ и другите финансиери во земјата, за успешни сегашни и идни проекти коишто ќе донесат придобивки за граѓаните на Северна Македонија – рече Павлова.

Малите и средните претпријатија се сржта на секоја економија, тие обезбедуваат работни места, создаваат додадена вредност и предводат со иновативни решенија, особено кога станува збор за приоритетите на ЕУ, како што се зелената и дигиталната агенда. Токму затоа Тим Европа, односно Европската Унија и земјите членки, како и поврзаните финансиски институции, презема чекори да ги поддржи малите и средни претпријатија во Република Северна Македонија уште од почетокот на пандемијата. Тие можат да инвестираат и да креираат иновации, така што со помошта од ЕУ можат да ја одиграат својата улога во опоравувањето на економијата од здравствената криза – рече Дејвид Гир, амбасадор на Европската Унија во земјава.

Директорот на Развојната банка посочи дека соработката со ЕИБ е стратешка и успешна. Во последните 13 години до денес, воспоставени се шест договори со коишто 550 милиони евра се ставени во полза на економскиот развој на земјава, со што се поддржани 2.090 проекти на домашни мали и средни компании и креирани се 8.029 нови работни места.

– Во периодот пред нас, којшто е фокусиран на економското закрепнување и на забрзан економски раст, потребно е да се искористи потенцијалот за раст, развој и адаптација на компаниите преку цврст партнерски однос помеѓу нив и финансиските институции. Како развојна банка, ќе продолжиме одблизу да ги следиме потребите на реалниот сектор и ќе настојуваме да нудиме портфолио на производи и услуги коишто ќе го засилат искористувањето на нивниот потенцијал. Во таа насока, преку овие 100 милиони евра очекуваме да обезбедиме финансиска поддршка, преку комерцијалните банки, за најмалку 300 проекти на домашни мали и средни компании – рече Наумов.

Од претходните пет заеми од Европската инвестициска банка преку Развојната банка пласирани се вкупно 450 милиони евра, од кои 182 милиона евра кон компании од производствената дејност, 127 милиони евра кон компании со дејност трговија, 40 милиони евра кон компании од транспортната дејност, а останатите средства кон компании од други дејности како што се услуги, угостителска дејност, здравство, образование.

Извор: Министерство за финансии 

spot_img
spot_img
spot_img

Последни објави

spot_img
spot_img
spot_img
spot_img
spot_img
spot_img
spot_img
spot_img

Читај повеќе

spot_img
spot_img