Министерот за финансии, Фатмир Бесими вчера го достави дополнетиот Предлог-буџет за 2022 година до претседателот на Собранието, Талат Џафери, а истиот Собранието треба да го усвои на пленарна седница најдоцна до 31 декември.
Дополнетиот Предлог-буџет за 2022 година ги содржи прифатените амандмани во текот на расправата во собраниските комисии. Вкупната вредност на прифатените амандмани изнесува 382 милиона денари и се проценува како една од најголемите измени направена преку амандманска расправа, што е потврда за инклузивноста на процесот на усвојување на Буџетот и демократскиот капацитет на нашата земја.
На средбата министерот Бесими истакна дека очекува дебатата да продолжи во ваков дух и на пленарната седница и притоа со широка поддршка да се усвои Буџетот за 2022 година.
Главни цели на Буџетот за 2022 година се продолжување на грижата за заштита на здравјето на населението, економско заздравување и забрзување на растот, зголемување на инвестициите, при спроведување фискална консолидација, како и поддршка на реформските процеси во правосудството и евроатлантските интеграции и непречено финансирање на основните функции на државата.
Главниот фокус во Буџетот за 2022 година е ставен на инвестициите, така што капиталните расходи се планирани на досега највисоко ниво од 38,2 милијарди денари. Капиталните расходи учествуваат со 14% во вкупните расходи и се зголемени за 28,3% во споредба со 2021 година. Притоа има кратење на непродуктивните трошења.
Буџетот е конципиран според златното правило во јавните финансии, односно буџетскиот дефицит е помал од капиталните расходи, што значи дека задолжувањето ќе биде само за капитални расходи, а средствата ќе бидат насочени кон проекти што даваат најголем ефект. Тоа ќе поттикне инвестициски циклус што ќе придонесе за забрзан економски раст,
Со дополнетиот Предлог-буџет за 2022 година расходите се планирани во износ од 272,4 милијарди денари што претставува раст од 1,4% во споредба со 2021 година и се на ниво од 35,2% од БДП. Приходите се планирани на ниво од 238,9 милијарди денари и се за 7,4% повисоки од 2021 година. Оттука, буџетскиот дефицит се планира на ниво од 33,5 милијарди денари или 4,3% од БДП.
Извор: Министерство за финансии
