Министерот за надворешни работи, Бујар Османи имаше обраќање на отворањето на регионалната школа за безбедност насловена “Хибридните закани и надворешни актери во време на воена агресија во Европа – импликации врз регионалната безбедност”, што се одржува во просториите на Министерството за надворешни работи, а во организација на Универзитетот „Св.Климент Охридски”- Битола, Фондацијата „Конрад Аденауер“ и Вилфред Мартенс Центарот за европски студии од Брисел.
Министерот Османи се осврна на актуелната безбедносна ситуација предизвикана од руската воена инвазија во Украина и потребата од заеднички пристап на меѓународната заедница за зачувување на европската и трансатлантската безбедност. Воедно, истакна дека хибридните закани, нивната брзина, обем и интензитет се зголемија во последниве години за што е потребна брза реакција, со цел нивно спречување, спротивставување и санирање на можните последици.
“Во актуелното безбедносно опкружување, повеќе од кога било, евроатлантската и европската интеграција на Западен Балкан треба да се гледа како алатка за подобрување на безбедноста и консолидирање на стабилноста на регионот. Демократските вредности ќе преовладуваат доколку има политичка поддршка и заедничко дејствување на политичкиот Запад, како и солидарност со оние кои ги прифаќаат истите вредности и ги бранат без компромис. Ова е причина повеќе за вградување на нова динамика во европската и евроатлантската интеграција на Западен Балкан” порача Османи.
Пред присутните студенти и професори од Северна Македонија, Бугарија и Србија се обратија и Н.Е. Анке Холштајн, амбасадор на Сојузна Република Германија во Северна Македонија Даниел Браун, официјален претставник на Фондацијата Конрад Аденауер, професор Марјан Ѓуровски, проректор на Универзитетот „Св. Климент Охридски“ – Битола и Катерина Јакимовска од Центар за европски студии Вилфрид Мартенс, Брисел.
