Министерката за труд и социјална политика, Јованка Тренчевска завчера оствари средба со амбасадорката на Република Хрватска во земјава, Нивес Тигањ, на која стана збор за досегашната воспоставена соработка и можностите за идна соработка во областите кои се во надлежност на Министерството за труд и социјална политика.
Во насока на досегашната соработка, Министерството за труд и социјална политика и Министерството за социјална политика и млади на Република Хрватска веќе имаат склучен Меморандум за соработка во областа на социјалната политика. Започнат е и процес на усогласување на текст за меморандум со Министерството за труд и пензиски систем, кое во меѓувреме се трансформираше во Министерството за труд и пензиски систем, семејство и социјална политика.
Министерката Тренчевска изрази интерес за пренесување на хрватското искуство потребно за процесот на преговарање и формулирање на преговарачките позиции на нашата држава со Европската Унија за поглавје 2 Слободно движење на работници и поглавје 19 Вработување и социјална политика.
Хрватската амбасадорка Тигањ изрази голема поддршка на Република Северна Македонија во преговарачкиот процес со ЕУ и воспоставување на потесна соработка помеѓу ресорните министерства на двете држави.
Соговорничките изразија подготвеност за воспоставување на продлабочена соработка и склучување на меморандуми за соработка и билатерални договори за вработување на сезонски работници со што би се заштитиле правата на работниците на двете држави во насока на обезбедување на пристап до социјална заштита и заштита на правата кои произлегуваат од работен однос.
На средбата се разговараше и за размена на искуства помеѓу двете држави на прашањето за спречување и заштита од насилство врз жени.
Двете страни се согласија за продлабочување на соработката во областите пазар на труд, социјална заштита и заштита од насилство.
