Заменикот министер за информатичко општество и администрација Александар Бајдевски учествуваше на конференцијата во Сараево „Инвестирање во дигитализацијата на Западен Балкан“ во рамките на која се одржа и Координативен состанок на донаторите посветен на темата: Заеднички регионален пазар во Западен Балкан – Регионална дигитална област.
Бајдевски потенцираше дека Владата на Северна Македонија е посветена на изградба на безбедна и одржлива дигитална инфраструктура, како основа за дигитална трансформација, со крајна цел да има стабилно и издржливо дигитално општество.
Меѓу другото се осврна на активностите во однос на дигитализацијата и сајбер безбедноста како главни приоритети за Северна Македонија.
,,Основањето на Агенција за дигитализација е многу важно за исполнување на овие приоритети. Владата и МИОА веќе го започнаа процесот за формирање на Агенцијата, со сајбер безбедноста како главен столб. Постојат неколку стратегии во финална фаза, кои ќе бидат усвоени од македонската влада во следните неколку месеци: Стратегија за реформа во јавната администрација 2023-2030 година, Национална стратегија за ИКТ 2023-2027 и Национална стратегија за сајбер безбедност 2023-2027 година. Дополнително, имаме национален оперативен план за широкопојасен интернет 2019-2029 година. Главните цели во овие стратегии, кои ја дефинираат насоката во која нашата влада ќе работи и инвестира во наредниот период, се подобра дигитална поврзаност и ИКТ инфраструктура, зголемени дигитални вештини, подобрени национални капацитети за сајбер безбедност, безбедна и отпорна критична инфраструктура и безбедни и отпорни национални ИКТ системи. За да се постигне сето ова, соработката на Северна Македонија со другите економии од ВБ6 и со земјите-членки на ЕУ е од клучно значење за развојот и напредокот на земјата“, истакна Бајдевски.
Бајдевски се осврна и на потребата од проширување на владината оптичка мрежа, зголемување на интернет покриеноста во земјата, како и изградба на еден владин центар за податоци каде ќе биде поставена опремата на сите национални ИКТ решенија како што се Националната платформа за интероперабилност, Национален портал за е-услуги итн.
,,Процесот на развој на нови и оптимизација на постоечките е-услуги е континуиран и се движи кон зголемување на бројот на нови услуги и зголемување на бројот на корисници на тие услуги. Наш приоритет, каде помошта може да биде применлива, е развој на прекугранични услуги. Главните активности во оваа област се: Иницијатива за отворен Балкан, каде што работиме заедно со Албанија и Србија на доделување OpenBalkanID за граѓаните од овие три економии, овозможувајќи им на граѓаните да имаат слободен пристап до работната сила. Услугите за добивање OpenBalkanID и регистрација во регистарот на слободен труд ќе бидат првите две услуги, а ќе се развијат дополнителни услуги. Исто така, Северна Македонија активно учествува во работната група за интероперабилност и доверливи услуги на RCC, каде што има дискусии и планови за прекугранични услуги меѓу економиите на WB6. Северна Македонија е активен поддржувач и е подготвена да ги поддржи сите иницијативи за прекугранични услуги на WB6 и на ниво на ЕУ“, истакна Бајдевски.
На настанот организиран од Регионалниот совет за соработка, Европската банка за обнова и развој и Европската инвестициска банка, учествуваа владини претставници од регионот на Западен Балкан, ИТ експерти, донатори, при што се одржаа целодневни дискусии, панели и презентации, а во фокусот беа новите технологии и дигиталните трансформации и успешни модели на дигитализација во регионот, како и инфраструктурата.
Извор: Министерство за информатичко општество и администрација
