Автомобилизам е еден од спортовите во кои може да се пофалиме со европски шампион. Игор Стефановски Иџе по трет пат стана Европски првак во автомобилизам, а пехарот гордо го претстави во Агенцијата за млади и спорт.
-Вистинско задоволство е да се биде на чело на највисокото тело за спорт во државава кога може да се пофалиме пред Европа дека токму нашиот претставник е Европскиот шампион во автомобилизам, истакна Наумче Мојсовски.
Тој додаде дека титулата која Иџе ја освојува веќе трет пат по ред, ја обрврзува Агенцијата за млади и спорт и понатаму да нуди целосна поддршка, која ќе обезбеди голем дел од трошковите во овој, за нас, скап спорт.
-Огромна благодарност до Агенцијата за млади и спорт за иницијативата и реализација на средства без кои не е можно да се успее во една ваква авантура, наречена Европски шампионат. Поддршката која ни нуди Агенцијата на сите спортисти треба се оправда, истакна Иџе.
Тој додаде дека негов план за идната сезона е настап на ридски патеки, но со цел да ги сруши сите рекорди во генерален пласман, додека пак настапот на кружни патеки е опција која зависи од буџетот со кој ќе располага тимот.
-Штета е што во државава политичката власт преовладува над спортската, а факт е дека спортистите се тие што и носат радост на секоја држава и народот кој живее во неа, додаде Стефановски.
Извор: Агенција за млади и спорт
