spot_imgspot_img
spot_img
spot_img
HomeВладаКовачевски: По 40 години, рехабилитиран регионалниот пат Битола-Меџитлија, се поврзуваме со соседите,...

Ковачевски: По 40 години, рехабилитиран регионалниот пат Битола-Меџитлија, се поврзуваме со соседите, отвораме економски перспективи, го олеснуваме нашиот пат до ЕУ

Претседателот на Владата на Република Северна Македонија, Димитар Ковачевски, денеска, заедно со министерот за транспорт и врски, Благој Бочварски, министерката за култура Бисера Костадиновска-Стојчевска и директорот на Јавното претпријатие за државни патишта, Ејуп Рустеми, беа на увид на рехабилитираниот регионален пат  Битола-Меџитлија, чија што рехабилитација заврши и патот е пуштен во употреба. Премиерот Ковачевски посочи дека инвестицијата за рехабилитација на овој патен правец во должина од 12,5 километри е во вредност од 3,28 милиони евра.

„Овој патен правец кој децении наназад бил запоставен, а сега рехабилитиран, е од исклучително значење, особено што се работи за дел од европскиот Коридор 10-д, кој нè поврзува со нашиот јужен сосед. На целиот Коридор се работи навистина интензивно и тоа на сите делници што на крајот ќе резултира со модерен патен правец од Коридорот 10, поврзување со Коридорот 10-д преку Прилеп, Битола, до границата со Грција. Со тоа целиот овој регион добива нов инфраструктурен лик“, изјави премиерот Ковачевски, во неговото обраќање на настанот, потенцирајќи дека резултатите на Владата се видливи.

Министерот за транспорт и врски, Благој Бочварски, рече дека во соработка со Јавното претпријатие за државни патишта, се реализираат повеќе проекти во делот на инфраструктурата во Пелагонискиот Регион.

„Министерството за транспорт и врски во соработка со Јавното претпријатие за државни патишта го бележи најголемиот инвестициски циклус во изградба и модернизација на патната мрежа низ целата држава. Ова особено се случува во Пелагонискиот Регион, каде започнавме со реализација на најкрупните инфраструктурни проекти во независна Македонија. Пелагонискиот Регион е многу значаен за развој на нашата земја и затоа токму овде вложуваме сериозни финансиски средства и сме силно посветени во модернизацијата на патната инфраструктура. Сите проекти во регионот се одвиваат со добра динамика со што во еден континуиран процес ќе ја заокружиме целата патна врска од главниот автопат на Коридор 10, па се до граничниот премин Меџитлија“, потенцираше министерот Бочварски.

Директорот на Јавното претпријатие за државни патишта, Ејуп Рустеми рече дека денеска, заедно со премиерот и министерот за транспорт и врски, официјално ја одбележуваат завршената рехабилитација на државниот пат А3, делница Битола-Меџитлија.

„Рехабилитиравме 12,7 километри со средства обезбедени од ЕБОР во висина од 3,27 милиони евра, Ширината на оваа патна делница е променлива и се движи од 6 до 6,5 метри. Требаше да поминат 40 години за патниот правец Битола – Меџитлија да биде за прв пат рехабилитиран! Овој патен правец кој води до граничниот премин Меџитлија и кој е главна артерија за проток на сообраќај помеѓу двете соседни земји беше во исклучително лоша состојба, но и покрај тоа не беше приоритет за рехабилитација. Тргнувајќи од оваа цел, во нашата програма приоритет добија патните правци што водат кон граничните премини со нашите соседи. Факт е дека ако сакаме добра економска соработка треба да понудиме и добра патна поврзаност, а добрата патна поврзаност значи и поголем развој на туризмот од што придобивка имаат сите“, рече директорот Рустеми.

При тоа, премиерот Ковачевски посочи дека во Пелагонискиот Регион активно се работи на повеќе инфраструктурни проекти како што автопатот Прилеп-Битола, патниот правец Градско-Прилеп, рехабилитацијата на патните правци до помалите населени места, Нижополе, Ротино, Бучин, Житоше, Демир Хисар, а оваа година се предвидени рехабилитации и на патните правци што водат до Лопатица, Могила и Будаково. За идната година се обезбедуваат средства за изградбата и на нов експресен пат Битола-Меџитлија со обиколница околу Битола, за кој веќе има одобрен инфраструктурен и ревидиран основен проект, притоа водејќи грижа и за животната средина.


Изјава на премиерот Димитар Ковачевски 

Претседателот на Владата на Република Северна Македонија, Димитар Ковачевски, денеска заедно со министерот за транспорт и врски Благој Бочварски  и директорот на Јавното претпријатие за државни патишта Ејуп Рустеми, даде изјава за медиумите по повод пуштањето во употреба на рехабилитираниот регионален пат  Битола- Меџитлија.

На настанот присуствуваше и министерката за култура Бисера Костадиновска Стојчевска.

Во продолжение е интегралниот текст од изјавата на премиерот Ковачевски:

„Почитувани колеги од Владата, почитувана пратеничке, почитувани граѓани.

Нашата земја се гради и се поврзува, затоа што континуирано вложуваме во инфраструктурата и во капиталните инвестиции.

Денеска сме овде во Битола,  на регионалниот пат Меџитлија, на границата со Грција, чија што рехабилитација заврши и патот е пуштен во употреба.

Инвестицијата за рехабилитација на овој патен правец во должина од 12,5 километри е во вредност од 3,28 милиони евра. Овој патен правец кој децении наназад бил запоставен, а сега рехабилитиран, е од исклучително значење, особено што се работи за дел од европскиот Коридор 10-д, кој нè поврзува со нашиот јужен сосед.

Само со посветеност, прецизни планови и стратегија,  може да се реализираат инфраструктурни проекти од значење за граѓаните и генерално за економијата.

Коридор 10-д кон Пелагонискиот регион го издигнуваме на ниво на модерен и безбеден патен правец кој ќе создаде економски перспективи за сите компании и граѓани во регионот. Како што може да се уверат сите на целиот коридор се работи навистина интензивно и тоа на сите делници што на крајот ќе резултира со модерен патен правец од Коридорот 10, поврзување со Коридорот 10-Д преку Прилеп, Битола, до границата со Грција. Со тоа целиот овој регион добива нов инфраструктурен лик.

Нашите резултати се видливи. Во тек се големите градежни зафати за изведба на најмодерно автопатско решение со реализацијата на автопатот Прилеп-Битола, а се работи и на патниот правец Градско-Прилеп. Тука сакам да потенцирам дека не ги заборавивме и рехабилитацијата на патните правци до помалите населени места, Нижополе, Ротино, Бучин, Житоше, Демир Хисар, а оваа година се предвидени рехабилитации и на патните правци што водат до Лопатица, Могила и Будаково.

Веќе за идната година обезбедуваме средства за изградбата и на нов експресен пат Битола-Меџитлија со обиколница околу Битола, за кој веќе имаме одобрен инфраструктурен и ревидиран основен проект, притоа водејќи грижа и за животната средина.

Овие инфраструктурни проекти значат современ и безбеден сообраќај на целиот регион, но и економски развој  на Пелагонија.

Реализацијата на патните правци од Коридорот 10-д ќе овозможат привлекување на странски инвестиции, нови бизниси и отворање на нови работни места, нови можности за сите граѓани од овој регион, но и нови перспективи за нашата држава.

Фокусирани сме на европските стандарди, развиена економија, брз и безбеден сообраќај, подобар и поквалитетен живот за сите и тоа секаде во нашата држава.

Тоа што го ветуваме, тоа и го исполнуваме.

Со изведбата на новите модерни патишта, ја реализираме најголемата инфраструктура и патна инвестиција во нашата држава, изведбата на Коридорите 8 и 10-д вредни 1,3 милијарди евра.

Вложуваме во инфраструктурата, обезбедуваме квалитетен живот за нашите граѓани и со тоа го олеснуваме нашиот пат до ЕУ. Трасираме модерни патишта, трасираме европска иднина!

Еден од нашите врвни приоритети е Република Северна Македонија да стане светска сообраќајна и трговска крстосница, а не регион којшто ќе го заобиколуваат!

Тоа го ветивме и тоа ќе го оствариме!

На крај сакам да се заблагодарам на сите што учествуваа во оваа рехабилитација, на брзата изведба и да посакам успех при изградбата на новиот експресен пат до границата со Грција.

Ви благодарам!“

 

 

 

 

Извор: Влада

Прочитајте

МЗ: Средба со директорот на ФЗОМ – Разгледани можностите за проширување...

0
Министерот за здравство Арбен Таравари одржа состанок со директорот на Фондот за здравствено осигурување, д-р Александар Клековски, претставници на Фарамабренд-Нова (асоцијација на иновативни фармацевтски...