Општина Делчево потпиша Меморандум за соработка со Доброволното противпожарно друштво „Волонтер“ од Делчево. Со Меморандумот се предвидува континуирана соработка, заеднички активности и конкретни мерки за подобрување на безбедноста на граѓаните, а Општината ќе помага и логистички и технички со цел да се обезбеди уште поголема ефикасност на терен.
За градоначалникот Гоцевски потпишувањето на овој документ значи зајакнување на заедничката подготвеност и координацијата во справувањето со пожари и други елементарни непогоди.
–Како општина ќе стоиме цврсто зад овие луѓе, помагајќи ги и логистички и технички согласно со можностите на Општината. Изразувам искрена благодарност за нивната целокупна ангажираност и несебичен придонес за заштита на нашата заедница. Наш приоритет останува заштитата на населението и создавање побезбедна општина за сите, нагласи Гоцевски.
Доброволните противпожарни друштва имаат исклучително значајна улога за безбедноста на заедницата, особено во помалите општини и претставуваат дополнителна сила и поддршка на професионалните пожарникари во заштита на животот, имотот и природата.Доброволните противпожарни друштва се симбол на хуманост, пожртвуваност и заедништво, бидејќи нивните членови доброволно го вложуваат своето време и знаење за заштита на заедницата.
Извор: Општина Делчево
