Нов изглед доби Подрачното училиште во Прдејци при
ООУ „Ристо Шуклев“- Негорци по изведбата на молеро-фарбарските работи на надворешноста на зградата. Имено, со издвоени средства од Буџетот на училиштето, обновена е фасадата на училишната зграда. Пред обновувањето, во дворот на училиштето од северната страна се реализираа градежни работи за бетонирање и оградување.
Директорката на ООУ „Ристо Шуклев“- Негорци, Жаклина Линкова, истакна дека следен зафат за подобрување на условите за реализирање настава e замена на стариот дотраен и амортизиран под во Спортската сала на училиштето:
– Станува збор за поставување специјален гумен под, за што беше спроведена тендерска постапка. Деновиве, треба да уследи потпишување на договорот со изведувачот. Така што, со реализацијата на овој зафат значително ќе бидат олеснети условите за развивање на здравото тело и негување на спортскиот дух на учениците, во склоп на предметот Спорт и спортски активности.
Извор: Општина Гевгелија
