Според календарот на Обединетите нации, денес, 22 март е Светски ден на водата. 2023 година е годината посветена на промените во користењето на водните ресурси и се обележува под мотото: Биди промената која сакаш да ја видиш во светот.
По тој повод градоначалникот на Општина Илинден, Александар Георгиевски и директорот на ЈКП ,,Илинден” Ивица Трипуновски ги посетија дечињата од детската градинка во н.м Миладиновци и заедно донесоа заклучоци за важноста на водата во човековиот живот.
Водата е основата за постоењето на живот на планетата Земја, а чистата вода за пиење и за одржување на хигиената е неопходна за одржување на животот и здравјето на целиот жив свет.
Треба да работиме заедно за одржливо управување со овој скапоцен ресурс.
Да ја вреднуваме и цениме водата!
Дечињата за овој ден имаа подготвено приредба на тема за водата, а на градоначалникот и директорот им подарија подароци изработени од нивните вредни рачиња.
