Министерот за здравство, д-р Фатмир Меџити, заедно со претседателот на Владата, Димитар Ковачевски, со амбасадорката на САД, Ангела Агелер ја посетија Универзитетката клиника за гастроентерохепатологија по повод комплетно реновирање на првиот кат за интензивна и постинтензивна нега на Клиниката, вклучувајќи ги кабинетите за дијагностика и интервенции. Министерот Меџити ја поздрави поддршката од Амбасадата на САД, посебна благодарност упати до Владата и премиерот Ковачевски за поддршка на проектите за унапредување на здравствениот систем.
-Нашата визија е инвестирање во здравствениот систем – со посебен фокус на инвестирање во сите региони поддеднакво и развивање регионални центри низ државата, за што имаме изготвено детален план за реорганизација на здравствениот систем. Работиме истовремено за унапредување на сите аспекти – подобрување на условите за лекување на пациентите, осовременување на инфраструктурата, реорганизација и подобрување на условите за вработените, истакна министерот Меџити. Премиерот Ковачевски нагласи дека најтешко болните пациенти од цела држава кои имаат потреба за болнички третман на Клиниката за гастроентерохепатологија отсега ќе престојуваат во достоинствени услови и ќе добиваат современи медицински услуги. Ова е прво вакво реновирање, откако е формирана Клиниката за гастроентерохепатологија Реновирањето е во најголем дел финансирано од Владата на САД, во вредност од над 400 илјади американски долари.
Извор: Министерство за здравство
