Постои цврста врска помеѓу ОБСЕ и Европската Унија. Сите земји-членки на ЕУ се и земји-учеснички на ОБСЕ, што создава поволен простор да работиме заедно во исполнувањето на нашите заеднички обврски.
Ова го истакна Претседавачот со ОБСЕ и министер за надворешни работи, Бујар Османи на состанокот со шефовите на делегациите на земјите-членки на ЕУ во седиштето на Обединетите нации во Њујорк. Османи ги претстави клучните приоритети и области во кои ОБСЕ и ЕУ можат да соработуваат – обезбедување мир во Европа преку ставање крај на војната во Украина преку употреба на механизмите и ресурсите што ги поседуваат, и ОБСЕ и Унијата, за одговор на сите безбедносни предизвици.
„Ја цениме поддршката, отвореноста и конструктивноста од земјите-членки на ЕУ за најактуелните прашања во врска со предизвиците и приоритетите на Претседателството. Во овој контекст, политички ќе ја продолжиме блиската соработка во рамките на ЕУ, но и на национално ниво ќе продолжиме да ги координираме нашите позиции со заедничката надворешна и безбедносна политика на ЕУ“, рече Османи.
Воедно, Османи пред шефовите на делегации на ЕУ ги претстави приоритетите на Претседателството на Северна Македонија со ОБСЕ, како и прашањата од доменот на функционалноста на Организацијата.
„Северна Македонија обезбедува политичко раководство на ОБСЕ, стремејќи се да придонесе во клучните процеси за севкупната европска безбедност. Без разлика колку се вознемирувачки и обесхрабрувачки последните случувања на терен, ние ќе продолжиме упорно да работиме на дипломатско решение“, потенцираше Османи.
За повторно враќање на целосната функционалност на ОБСЕ, Османи побара поддршка и од ЕУ, при што истакна дека новите предизвици бараат зајакната соработка меѓу ОБСЕ и ЕУ.
Османи на состанокот информираше и за неговата неодамнешна посета на регионот на Јужен Кавказ во својство на Претседавач со ОБСЕ и за претстојните планови и зошто силна и обединета Организација е клучна за зачувување на стабилноста и обезбедување на одржлив мир во поширокиот регион на ОБСЕ.
