Градоначалничката Данела Арсовска вчера присуствуваше на SKOPJE IT MEETUP и на САЕМ на претприемништво што се одржаа во просториите на средното училиште на Град Скопје „Владо Тасевски“.
Градот Скопје на едно место собра амбициозните ентузијасти од технолошките струки, искусни професионалци и претприемачи визионери кои споделија искуства за важноста на дигиталните технологии, кои се привлечни за младите луѓе кои својата иднина ја гледаат во сферата на информатичката индустрија.
На панел дискусии беа претставени новитетите во ИТ сферата, а се разговараше и за примената на асистивната технологија, за подемот на гејминг индустријата, примената на UX/UI дизајнот и за дизајнирање на иновативен ИТ продукт.
Искусни инвеститори и претприемачи на панелот споделија искуства и совети за успешно инвестирање во иновации и стартапи, и за претприемништвото во образованието.
Градоначалничката Арсовска по завршувањето на панел дискусиите ги посети штандовите на ученичките компании коишто се претставија во рамките на Саемот за претприемништво. Целта на саемот е да ги претстави можностите за вработување пред младите и да ги поврзе работодавачите со потенцијалните нови вработени во нивните компании.
Младите луѓе присутни на ИТ настанот имаа можност да учествуваат и во три работилници – за развојни вештини, за UX/UI дизајн и за одржливи бизнис практики.
Извор: Град Скопје
