Претставници од ансамблот „Никола Јонков Вaпцаров“ од Горно Лисиче, кои пред неколку дена во Турција освоија прво место за најавтентична народна носија, денеска беа поканети на средба со заменик-градоначалникот на Општина Аеродром, Дејан Митески.
На средбата тие ги пренесоа своите импресии од фестивалот на којшто учествуваа, разговараа за нивните идни планови, за тоа како се подготвуваат за настапите и колку многу љубов вложуваат во негувањето и зачувувањето на македонската традиција и култура.
Митески им честиташе за победата, им посака уште многу награди и им се заблагодари што достојно и гордо го претставуваат Аеродром насекаде низ светот. Тој им вети дека и во иднина Општината ќе ја продолжи соработката со нив и ќе им ја дава потребната поддршка.
„Никола Јонков Вапцаров“ е едно од најстарите културно-уметнички друштва во Општина Аеродром, но и во Скопје и дава голем придонес за развој на културата, а особено за запознавање на младите генерации со македонскиот фолклор.
Извор: Општина Аеродром
