Општина Аеродром ги поканува граѓаните на свечениот настан што ќе се одржи утре, 27 јули, на кој ќе се испратат коњаниците од Илинденскиот марш до славното Крушево, каде што на 2 август ќе се приклучат кон одбележувањето на големиот празник Илинден.
Традиционално, коњичкиот марш ќе започне од паркот „Јане Сандански“ во 17:00 часот кога на коњаниците ќе им биде предадено општинското знаме.
Потоа, придружувани од фаланга и игроорци од КУД „Никола Јонков Вапцаров“, со звуците на зурлите и тапаните, тие ќе се упатат кон црквата „Свети Петар и Павле“ во Горно Лисиче, минувајќи низ главните булевари на општината.
Пред испраќањето на илинденците, во црквата со почеток од 18:30 часот ќе се одржи свечена литургија, по што следува богата музичка програма со настап на познати македонски естрадни уметници.
Општината и оваа година финансиски го поддржува Илинденскиот марш како една од најголемите и најзначајните манифестации во Аеродром, со што се негуваат традицијата и македонската култура.
Извор: Општина Илинден
