Градоначалниникот на Битола Тони Коњановски заедно со претседателката на Комисијата за еднакви можности при Советот на Општина Битола, Марина Крстиќ имаа средба со извршната директорка на Национална мрежа против насилство врз жените и семејно насилство „Глас против насилство”, Елена Димушевска. На средбата се разговараше за продолжување на досегашната соработка и овозможувањето поголема грижа за жртвите на семејно насилство.
Општина Битола продолжува да обезбедува континуирана финансиска поддршка од 1 милион денари за советувалишниот центар за жените и децата жртви на родово базирано и семејно насилство, се со цел непречено функционирање на центарот, каде што жртвата добива психолошка поддршка, кариерно советување и правна помош.
Националната мрежа „Глас против насиство” ја има обврската за раководење со советувалишниот центар согласно стандардите за работа на советувалишните центри за жртви на семејно насилство усвоени од Министерството за труд и социјална политика.
Претставниците на општината и Националната мрежа, денеска го посетија советувалишниот центар во Битола, кој има нова локација и се наоѓа на улицата „Пеце Матичевски” 77/1.
Покрај оваа соработка, Општина Битола реализира и програми за спречување на родово – базирано насилство, како дел од пошироките иницијативи за заштита на жените и децата. Главните мерки вклучуваат едукација и сензибилизација на јавноста, обуки за службениците, како и соработка со НВО и други институции за обезбедување помош и поддршка на жртвите.
Извор: Општина Битола
