Градежните активности на улицата „808“, во општина Гази Баба, се во својата завршна фаза, а градоначалничката Данела Арсовска денеска направи увид во отпочнување на работа на изградбата на новата велосипедска и пешачка патека по должината на коловозот, како и на новиот зелен појас.
– Екипите на терен денеска отпочнаа со завршната фаза на градежните работи на коловозот на улицата „808“ на потегот од крстосницата со улицата „16 Македонска бригада“ до крстосницата со булеварот „Киро Глигоров“, односно површина од 9.200 квадратни метри, во должина од 1.000 метри.
Покрај целосната реконструкција на коловозот, улицата „808“ добива и нова пешачко-велосипедска патека, од двете страни на улицата. Со реконструкцијата на оваа фреквентна сообраќајница по која се движат голем број товарни возила, бидејќи станува збор за индустриска зона, излегуваме во пресрет на барањата на граѓаните, а ова е еден од ветените проекти од програмата „За модерно Скопје“ – истакна градоначалничката Арсовска.
Претходно беше извршена целосна реконструкција на водоводната мрежа и на преостаната хидротехничка опрема, на атмосферската канализација, а беа заменети и нефункционалните сливници со што во иднина се превенираат поплави на овој потег. Градежните работи на улицата „808“ ги изведуваат екипите на јавното претпријатие “Улици и патишта” Скопје.
Извор: Град Скопје
