Во насока на обезбедување на нови содржини во Аеродром, заврши реализацијата на уште еден проект. Со садење зелени садници, градоначалникот на Општина Аеродром, Тимчо Муцунски и претседателот на советот Дејан Митески, официјално го пуштија во употреба новиот парк „23 Октомври“ лоциран во Стар Аеродром.
Благодарение на заложбите на Општина Аеродром и поддршката од општествено-одговорна компанија, аеродромци добија уште една зелена површина на простор од 2300 квадратни метри, целосно партерно уредена, со ново осветлување, со зачувување на постојното и садење ново зеленило, како и современи реквизи и урбана опрема за забава, рекреација и релаксација.
Градоначалникот Тимчо Муцунски се заблагодари за поддршката и соработката на сите кои беа вклучени во реализацијата на овој проект, најавувајќи нови проекти во текот на есента.
„Се радувам и се гордеам со ваквите проекти. Активностите за позелен и поубав Аеродром не застануваат тука, а почетокот на есента ќе го одбележиме со уште неколку зелени и спортски катчиња на неколку локации низ општината“, истакна Муцунски во својата објава.
Извор: Општина Аеродром
